Politika e privatësisë

Kjo faqe dhe shërbimi i dorëzimit menaxhohen nga FoodPro, Tiranë. Për çdo pyetje ose kërkesë për të dhënat e tua, na shkruaj në foodprotirana@gmail.com, na merr në +355 69 603 3787, ose përdor faqen Kontakt.

Mbledhim vetëm atë që na duhet për të pranuar, përgatitur dhe dorëzuar porosinë.

• Llogaria: email-i dhe emri që vendos. Nëse hyn me Google, marrim nga llogaria jote Google emrin, email-in dhe foton e profilit. Fjalëkalimin nuk e shohim ne: e ruan Firebase Authentication.
• Profili: emri, telefoni, alergjitë ose kufizimet, dhe shënimet për kuzhinën, nëse i shkruan.
• Adresat: emërtimi, rruga, qyteti dhe udhëzimet për kurjerin.
• Porositë: artikujt dhe çmimet, totali, adresa e dorëzimit, emri, telefoni dhe email-i, ora e kërkuar, mënyra e pagesës, shënimi yt dhe statusi.
• Abonimet: plani, çmimi, data e nisjes, dorëzimi i radhës, ndalesat dhe anulimet.
• Pjatat e ruajtura dhe të preferuarat, nëse i ruan.
• Mesazhet: emri, email-i, telefoni dhe teksti që na dërgon nga formulari i kontaktit.

Nuk mbledhim dhe nuk ruajmë të dhëna karte. Pagesa bëhet në dorëzim, me para ose me kartë te POS-i që sjell kurjeri, dhe ai transaksion ndodh jashtë kësaj faqeje.

Nuk kërkojmë dokumente identiteti dhe nuk ndjekim vendndodhjen tënde.

Faqja nuk vendos cookie reklamash. Në pajisjen tënde ruhen këto:

• Shporta dhe pjata që po ndërton rrinë vetëm te pajisja derisa të bësh porosinë. Nëse nuk porosit, nuk na vijnë kurrë.
• Sesioni i kyçjes ruhet nga Firebase Authentication, që të mos kyçesh sërish në çdo faqe.
• Një identifikues i Google Analytics, nëse shfletuesi yt e lejon.

Faqja mbështetet te disa shërbime të palëve të treta. Secili prej tyre sheh adresën IP dhe llojin e shfletuesit kur faqja ngarkohet:

• Firebase (Google): llogaria, të dhënat dhe vetë faqja. Serverët janë të Google Cloud.
• Google Analytics: na tregon cilat faqe shihen më shumë. Mbledh të dhëna përdorimi dhe pajisjeje, jo emrin ose adresën tënde.
• Google Fonts: shkronjat e faqes.
• Unsplash: një pjesë e fotove të vakteve.
• Google Sign-In, vetëm nëse zgjedh ta përdorësh për t'u kyçur.

Çdo klient sheh vetëm të dhënat e veta. Këtë e zbaton serveri, jo faqja: rregullat e Firestore nuk e lejojnë leximin e të dhënave të dikujt tjetër.

Stafi i FoodPro sheh porositë, abonimet, listën e klientëve dhe mesazhet, sepse pa to nuk përgatitet dot porosia. Ky akses është i kufizuar te dy llogari pune të FoodPro.

Nuk i shesim dhe nuk i shkëmbejmë të dhënat e tua me të tretë për reklama.

Të dhënat e llogarisë, adresat, pjatat dhe të preferuarat ruhen derisa t'i fshish ti.

Porositë dhe abonimet ruhen edhe pas fshirjes së llogarisë, sepse janë regjistrat e biznesit. Ato përmbajnë emrin, telefonin, email-in dhe adresën e dorëzimit ashtu siç ishin në momentin e porosisë.

Te faqja Llogaria ime, seksioni Siguria, e fshin llogarinë vetë. Kur e bën:

• Fshihen adresat, pjatat e ruajtura dhe të preferuarat, si dhe emri, telefoni, alergjitë dhe shënimet te profili.
• Fshihet edhe llogaria e kyçjes, ndaj nuk hyn dot më.
• Mbeten porositë dhe abonimet e kryera, me të dhënat e kontaktit dhe adresën që kishin atëherë.

Nëse dëshiron të hiqen edhe këto, na shkruaj dhe të tregojmë çfarë mund të fshijmë pa cenuar regjistrat që na duhen për kontabilitetin.

Te llogaria ke dy çelësa, për njoftime me email dhe me SMS. Sot ata ruajnë vetëm preferencën tënde: faqja nuk dërgon ende email ose SMS automatike. Kur duhet diçka për porosinë, të kontaktojmë me telefon.

Mund t'i shohësh dhe t'i ndryshosh të dhënat te faqja Llogaria ime, dhe mund ta fshish llogarinë prej andej në çdo moment.

Nëse dëshiron një kopje të të dhënave, një korrigjim, ose ke një ankesë, na shkruaj në foodprotirana@gmail.com. Përgjigjemi brenda ditës.

Nëse e ndryshojmë këtë politikë, përditësojmë datën në krye të faqes. Versioni në fuqi është gjithmonë ai që shihet këtu.